पुणे: पोलिस ठाणे २४ तास खुले, पण सेवा "त्यांच्या वेळेनुसार"च !

पुणे प्रतिनिधी: २४ तास नागरिकांसाठी खुले असले तरी पोलिस ठाण्याची सेवा मात्र त्यांच्या वेळेनुसारच मिळते, असा अनुभव अनेक तक्रारदारांना येतोय. सकाळपासून रात्रीपर्यंत पोलिस ठाण्याचा कारभार दोन शिफ्टमध्ये चालतो, मात्र नागरिकांच्या अडचणींवर तत्काळ उपाय मिळेलच, याची हमी नाही.

गुरुवारी सकाळी नऊ वाजता पहिल्या शिफ्टचे अधिकारी आणि कर्मचारी हजर झाले. प्रत्येकाला कामाचे वाटप झाल्यानंतर, त्यांच्यातील गडबड सुरू झाली. याच दरम्यान, लॉकअपमध्ये ठेवण्यात आलेल्या १४ आरोपींपैकी एकाला वस्तू देण्यासाठी आलेल्या नातेवाइकांना दीड तास थांबावे लागले. संबंधित अधिकाऱ्याशी संपर्क, चौकशी आणि परवानगी या प्रक्रियेमुळे वेळ वाया गेला.

"दैनिक लोकमतने" दिलेल्या वृत्तानुसार, दुपारी दीडच्या सुमारास संपूर्ण कर्मचारी वर्ग जेवणासाठी गेला. त्या वेळी आलेल्या दोन नागरिकांना चारित्र्य पडताळणीसाठी तब्बल दीड तास थांबावे लागले. कर्मचारी परतल्यावरच त्यांचे काम सुरू झाले. सध्या दररोज १० ते १५ चारित्र्य पडताळण्या होत असल्याचे समजते. पासपोर्टसाठी आलेल्या नागरिकांनाही याच परिस्थितीला सामोरे जावे लागते.

पहिल्या मजल्यावर असलेल्या स्तनपान कक्षाचा वापर सध्या इतर कामकाजासाठी केला जात आहे. महिला व बालस्नेही हेतूने तयार करण्यात आलेल्या या कक्षात टेबल-खुर्च्यांची गर्दी असून, खऱ्या उपयोगाला तो आला नाहीये. तसेच, अनेक कक्षांमध्ये वीज वाया जाते आहे. लाईट व फॅन बंद न करता कर्मचारी बाहेर जात असल्याने विजेचा अपव्यय होतोय. वारंवार वीज पुरवठा खंडित होत असल्यामुळे अनेक वेळा अंधारातच कामकाज चालावे लागत आहे.

सायंकाळी चारच्या सुमारास वरिष्ठ पोलिस निरीक्षक संजय मोगले न्यायालयीन काम उरकून ठाण्यात परतले. मात्र पाचनंतरच ते नागरिकांसाठी उपलब्ध झाले. दिवसभरात आलेल्या काही तक्रारींचे निराकरण झाले, तर काहींना पुन्हा येण्याचा सल्ला देण्यात आला.

विशेष म्हणजे, पोलिस ठाणे अत्याधुनिक म्हणवले जात असले तरी अजूनही हजेरी जुने पद्धतीने घेतली जाते. 'एम पोलिस' हे ॲप पूर्वी वापरले जात होते, मात्र आता ते बंद झाले आहे. परिणामी रात्रपाळी करून सकाळी पुन्हा कामावर येणाऱ्या कर्मचाऱ्यांचे हाल सुरूच आहेत.

संख्यात्मक चित्र

एकूण १४२ कर्मचाऱ्यांच्या या ठाण्यात ८८ पुरुष, ६६ महिला आणि ८ अधिकारी कार्यरत आहेत.

नागरिकांना सुरक्षा देण्यासाठी झटणारे पोलिस कर्मचारी त्यांच्या परीने कर्तव्य बजावत असले तरी व्यवस्थेत असलेली तफावत आणि वेळेचे बंधन हे नागरिकांच्या अनुभवांवर परिणाम करत आहे. सेवेला "चोवीस तास" असे बिरुद लावण्याआधी यंत्रणेला अंतर्मुख होण्याची गरज आहे.