पुणे : पीडित महिलांची ससून रुग्णालयातील तपासणी पद्धतीत बदल होणार? पोलीस आयुक्त अमितेश कुमार यांची राज्य महिला आयोगास सूचना; पुरुष वैद्यकीय तज्ज्ञाकडून तपासणी : पीडितेची महासंचालकांकडे तक्रार

पुणे : बलात्कार प्रकरणातील पीडित महिलांची ससून रुग्णालयातील वैद्यकीय तपासणी ही अत्यंत त्रासदायक असल्याचे निरीक्षण पोलीस आयुक्त अमितेश कुमार यांनी नोंदवले आहे. त्यांनी पीडितांना एका विभागातून दुसऱ्या विभागात फिरवणे ही "एक प्रकारची हेळसांड" असल्याचे सांगत, या प्रणालीत बदल करण्याची गरज असल्याचे स्पष्ट केले.

सोमवारी राज्य महिला आयोगाच्या अध्यक्षा रुपाली चाकणकर यांनी पुणे पोलीस आयुक्तालयास भेट दिली. यावेळी घेतलेल्या आढावा बैठकीत कुमार यांनी पीडित महिलांच्या वैद्यकीय तपासणी प्रक्रियेतील त्रुटींकडे लक्ष वेधले. "पीडित महिलांची तपासणी एका दिवसात पूर्ण व्हावी, आणि सर्व तपासण्या एकाच ठिकाणी व्हाव्यात, यासाठी ठोस उपाययोजना करणं गरजेचं आहे," असे त्यांनी सांगितले.

या बैठकीस पोलीस अधिकारी तसेच राज्य उत्पादन शुल्क विभागाचे अधिकारी उपस्थित होते. स्वारगेट बलात्कार प्रकरणाचाही यावेळी आढावा घेण्यात आला.

दरम्यान, स्वारगेट प्रकरणातील पीडित तरुणीची तपासणी एका पुरुष तज्ज्ञाकडून करण्यात आली होती. ही तपासणी महिला वैद्यकीय तज्ज्ञाकडून होऊ शकली असती, अशी नाराजी पीडितेने पोलीस महासंचालकांना पत्राद्वारे व्यक्त केली आहे. यावरून वैद्यकीय तपासणीसंदर्भातील संवेदनशीलता आणि प्रणालीतील त्रुटी पुन्हा समोर आल्या आहेत.

या पार्श्वभूमीवर चाकणकर यांनी ससून रुग्णालयाचे वैद्यकीय अधीक्षक डॉ. यल्लाप्पा जाधव यांना तपासणी प्रक्रियेतील सुधारणा करण्याच्या सूचना दिल्या असून, पुढील काही दिवसांत या संदर्भात उपाययोजनांची अंमलबजावणी होण्याची शक्यता आहे.